Shqipëria dhe Mali i Zi nuk kanë çështje të hapura mes tyre andaj duhet të çojnë përpara bashkëpunimin dy palësh në ekonomi për rritjen e shkëmbimit tregtar. Këtë mesazh përcolli Presidenti i Malit të Zi, i cili ndodhet në një vizitë zyrtare në vendin tonë gjatë një konference të përbashkët me homologun e tij Ilir Meta.
Filip Vujanoviç: Mes dy vendeve tona nuk kemi pyetje të hapura, kemi hapësira për punë.Në çdo hapësirë tjetër do të avancojmë në marrëdhëniet tona. Kemi mbledhje të përbashkët të qeverive dhe do të kërkojmë hapësirë për bashkëpunim jo vetëm në ekonomi por edhe fusha të tjera. Duhet të riafirmojmë projektet rajonale, në energjitikë dhe rrugët. Ti ofrojmë shanse ndërtimit të rrugës Adriatiko-Joniane dhe Gazsjellësit që është projekt i vendit tonë dhe kanë rëndësi dhe për rajonin.Jemi dy shtete që japim shembull për një kontroll të mirë të kufirit.
Vujanoviç gjeti rastin gjithashtu të falenderojë Shqipërinë për miratimin e ligjit të mbrojtjes së pakicave.
“Jemi mirënjohës për ligjin e mbrojtjes së pakicave. Falenderojmë Shqipërinë” u shpreh Vujanoviç.
Ndërsa Presidenti Meta vuri theksin tek përmirësimi i infrastrukturës në pikën e përbashkët të kalimit kufitar, me qëllim lehtësimin e qarkullimit të njerëzve. Meta gjithashtu nënvizoi rëndësinë e projekteve të përbashkëta për mbrojtjen e mjedisit përgjatë kufirit Shqipëri-Mali i Zi.
Ilir Meta: Marrëdhëniet tona janë shumë të mira por ne jemi ambiciozë për ti përmirësuar më tej. Mjafton të shohësh pikën e kalimit të përbashkët Muriqan-Sukobin, sidomos gjatë pranverës dhe verës, është sukses i përbashkët pasi është pika e parë e përbashkët e kalimit kufitar. Por kur shikon rradhë të gjata atje, shikon se ende ka vend për përmirësim, për të përmirësuar infrastrukturën, lehtësuar më tej kalimin e qytetarëve dhe turistëve, shkëmbimet po rriten dhe do rriten akoma më shumë me përmirësimin e infastrukturës së përbahskët. Kemi një kufi të jashtëzakonshëm që na bashkon më shumë se na ndan.
Do duhet të kujdesemi më shumë në projektet e përbashkëta për mbrojtjen e mjedisit. Pakica malazeze në Shqipëri është një pasur e paçmuar për ne, do të bëjmë çdo gjë për të ruajtur dhe zhvilluar identitetin e tyre. Pakicat nuk janë një rrezik por ura bashkëpunimi dhe miqësie. Dy vendet tona janë në momente mjaft pozitive, Shqjpëria është në prag të çeljes së negociatave për anatërësim, Mali i Zi është më i avancuar në këtë drejtim. Shpresojmë që vitin e ardhshëm dhe Maqedonia të reealizojë një sukses të tillë.
