Mediat bullgare një ditë më parë kanë raportuar për një person të tetë që ka shpëtuar nga tragjedia e djegies së autobusit ku humbën jetën 45 shqiptarë nga Maqedonia e Veriut.
Gjatë konferencës së djeshme, Prokuroja bullgare, Sijka MIleva, nuk u përgjigj në pyetjen se a është 36 vjeçari vjeçari Shaip Nauf Al Salah, shtetas i Emirateve të Bashkuara Arabe udhëtari misterioz.
Por pasagjeri i tetë që u përmend mes të mbijetuarve në aksidentin tragjik ka shkuar në mediet bullgare dhe është shprehur se ka një gabim që emri i tij është përfshirë në listat e të mbijetuarve pasi nuk ka asnjë lidhje me to.
“Sonte u zbulua misteri – pse ka mospërputhje në listën e të lënduarve në spitalin “Pirogov” dhe listës së pjesëmarrësve në udhëtimin e kompanisë turistike maqedonase,” shkruajnë mediet bullgare.
Personi i përmendur Shadi Nauf al Saleh shpjegoi se nuk kishte asnjë lidhje me aksidentin. Ai është shtetas bullgar dhe të shtunën është shtruar në repartin e traumës në Spitalin Pirogov për shkak të një thyerjeje të krahut.
Rezulton se në klinikë e kanë futur gabimisht në listën e të plagosurve nga autostrada e Strumës. Saleh tashmë ka dalë nga spitali.
