Presidenti i Ukrainës Volodymyr Zelensky ka zhvilluar një bisedë me kancelarin gjerman Olaf Scholz. Me anë të një postimi në Twitter, Zelensky ka bërë të ditura detajet e bisedës. Ai tha se kishte folur me kancelarin gjerman Olaf Scholz dhe kishte diskutuar për ndihmën mbrojtëse, bashkëpunimin në sektorin e energjisë dhe rritjen e sanksioneve ndaj Rusisë si një forcë pushtuese. Presidenti ukrainas tha se të dy biseduan për çështje në lidhje me “agresorin rus”.
“Ne e vlerësojmë nivelin e lartë të dialogut me Gjermaninë dhe mbështetjen në luftën tonë”, shkroi ai.
Zelensky e kishte ftuar më parë Scholz-in të bënte një deklaratë të fuqishme politike duke vizituar Kievin të hënën më 9 maj, ditën kur udhëheqësit gjermanë kanë udhëtuar shpesh në Moskë për të shënuar përkujtimin e Ditës së Fitores së Rusisë për humbjen e Gjermanisë naziste në Luftën e Dytë Botërore.
Ajo vizitë e veçantë nuk u zhvillua dhe Scholz përkundrazi ishte në Berlin, i shoqëruar nga presidenti francez Emmanuel Macron, ku Porta e Brandenburgut u ndriçua me ngjyrat e flamurit ukrainas si shenjë mbështetjeje.
Scholz kishte hezituar të vizitonte Ukrainën pasi Kievi nuk ishte i gatshëm të priste presidentin gjerman Frank-Walter Steinmeier. Steinmeier është jopopullor në Kiev, sepse ai është i lidhur me një politikë të mëparshme gjermane për ndjekjen e tregtisë së ngushtë dhe lidhjeve të tjera me Rusinë e Vladimir Putinit.
